إبراهيم مجدي 
مين اللى قال إن المال كل حاجة ف الحياة .
مين اللى قال إنه مصدر الأمن ولا حتى الأمان .
تقدر بفلوسك تشترى الدواء .. لكن مستحيل تشترى بيه الصحة .
تقدر تخرج و تسافر ف أجمل و أعظم البلاد .. لكن مش هتقدر تشترى بيه السعادة .
تقدر ترسم بيه ضحكة مزيفة على ملامحك .. لكن مش هتعرف تخرجها من قلبك .
تقدر تدخل أعرق المدارس و أغلى الجامعات .. لكن مستحيل تشترى بيه ذكاءك العقلى .
تقدر كمان تشترى بيه أنفس بعض البشر .. ولكن اتحداك تشترى محبتهم .
تقدر تشترى أفخم القصور .. ولكن قلبك ممكن يعيش ف وحدة أعظم و اكبر من كل قصور الدنيا .
المال وسيلة للحياة و لكن مش هو مصدر الحياة
مش من النجاح إنك تحقق ثروات مالية ملهاش عدد
لكن النجاح الحقيقى هو ثروة محبتك جوة قلوب الناس .
ناس تدعيلك بالخير و الصحة و بالستر
صدقنى يا عزيزى ولا اى نعم فى الحياة تساوى نعمة الستر
ستر ف الصحة ، ستر عن الاحتياج ، ستر ف راحة البال ، ستر عن اخطاء او هفوات أخفاها الله عن أعين البشر .
و قبل ما تقول لحد يا بختك دة أنت غنى !!!
شوف النعم اللى هو محروم منها ..
شوف هو مستعد يدفع كام من ثروتة مقابل أى إحتياج آدمى .
المال ما هو إلا ثروات مزيفة و وقتية مهما كانت درجة متعتها .
ولكن إصنع لك ثروات حقيقة ف قلوب البشر
” بالمحبة و اللين و العطاء ”
إصنع لك ثروات دائمه تبدأ بدعوات الخير لك و لا تنتهى أبداً .
إصنع لك البركات أينما وجدت أنت وجدت البركة ف يدك .
إصنع السلام بين قلوب الناس .
كن صانع للسعادة .. تسكن بداخل قلوب كل من يراك .
و الأهم .. أكسب قلب الله برضاك و شكرك الدائم له .
هى دى الثروات الحقيقية … مش المزيفة .
