محمد 
( 100 ألف سؤال )
كله بيدخل ويطفّي النور
يعمل نايم .. يعمل مقتول
كله بيدخل ويرُد الباب
ويحاسب نفسه ألف حساب
وف آخر الليل تبدأ مواويل
وتلاقي دموع وجبال مناديل
واتقلّب فجأة يمين وشمال
واسأل نفسي 100 ألف سؤال
هي حياتنا بجد وعادي ؟!
فيها بنكبر ليه ع الفاضي ؟!
ونهادي بعض ونتهادى
بكلام معسول أوي بزياده
وأدينا بنكدب كالعادة
ف نهار مالهوش أصلا عازه
والليل بندادي ببزازه
يمكن يصاحبنا مره النوم
نلاقيه مخنوق جوّه إزازه
وأفضل أجيب وافضل اودي
أيام سوده مسيرها تعدي
وناخد قراراتنا ف آخر الليل
والصبح بنرجع ف كلامنا
ما كلام الليل مدهون سمنا
لا قرار هيغير ملامحنا
ولا يعرف حد اللي جرحنا
برّايا البسمة مرسومة
جوّايا مضروب بالشومة
ومكسّر حتى لغضاريفي
تاه مركبي .. ضاعِت مجاديفي
وأبص لوشي أشوف بومه
ويا أرضى بحظي ونصيبي
لأحاسب وادفع من جيبي
لحسابي يا ناس وحساب غيري!
____
