رضا طلعت فهيم يكتب : ممكن تحب شخص ؟

بذمتك مسالتش نفسك كده ؟
حصل ايه ..طب ازاى …معقول كده
أوقات ممكن تحب شخص أوى لحد ما تحس إنه بقى حته منك وان حياتك مش ممكن تستمر من غيره..فجأه ف يوم م الأيام تلاقى المحبه دى بتقل فى قلبك..ويوم بعد يوم بيتحول من شخص قريب أوى لشخص غريب عنك..أو ع الأقل بيبقى زيه زى بقية الناس ..لا انت بقيت بتحبه زى الأول ولا تقدر كمان تكرهه ..
وتسأل نفسك هو إيه اللى حصل ؟
اللى حصل إن رصيده بيفضل يقل يقل لحد ما يختفى ..رغم انه كان قريب أوى إلا إن فيه حاجه حصلتلك هو ممكن مش واخد باله منها..إن شجرة العلاقة اللى بينكوا بتحتاج رعايه واهتمام عشان تقدر تتنفس..وهو بيكون فاكر إن استمرار الكلام بينكوا أكبر دليل ان العلاقه لسه عايشه..فى حين انها ماتت من زمان..
عشان بقى ينساك ..حتى لو فاكرك بينه وبين نفسه لكن مش بيعمل أى حاجه لصالح العلاقه..ينسى يهتم..يسأل..يشارك..ينسى انت كنت بتحب إيه..بتكره إيه..بتتبسط من إيه ..بتضايق من ايه ..
فى الحقيقه انت بتفضل تديله بدل الفرصه ألف وتحاول معاه عشان انت فعلا بتحبه..بس بييجى عليك وقت بتحس فيه إنك نشفت ومبقاش عندك حاجه تديهاله..لأنه ببساطة مكانش بيحاول يسقى العلاقه بينكوا ..لحد ما فى الآخر تلاقى روحك اتغربت عنه..وتلاقى الكلام بينكوا بقى رسمى وتلاقى أموره وحياته مبقوش يهموك..ومبقيتش تجرى عليه ملهوف زى الأول..وهتجرى عليه ازاى وهتخبط على أنهى باب إذا كان هو قفل بإيده كل البيبان..
العلاقه اللى بتموت بالطريقه دى فى رأيى أخطر من موت أى علاقه تانيه بيصاحبها خناقات ودوشه..عارف ليه ..لأن العلاقه اللى فيها دوشه بتقول أنا محتاجك ولسه عاوزك جنبى..لكن العلاقه اللى زى دى ممكن تموت فى صمت بانسحاب الطرف اللى بيتألم ووقتها مش بيتكلم كتير..عشان مبقاش فيه فى قلبه ليك أى عتاب أو كلام
هو كلامى ده بيحصل ولا انا قد اكون ببتخيل هذا ؟