إبراهيم مجدي 
هو مفيش غير الغلابة يشيلوا البلد ويستحملوا ظروفها؟ مش معانا ناس تانية مليونيرات؟ وبيقبضوا بالدولارات؟ دول مش مفروض يشيلوا شوية؟ ولا لو نصيبهم قل شوية مصر هتخرب؟
الحد الأدنى محتاج قفزة لحد 20 الف والحد الأقصى محتاج نزلة لحد 80 الف،، وده يدى لده،
لكن كده حرام ،، الضرب كله على الغلبان وموظف الحد الأدنى وبتاع المحليات ومنكوبى المعاشات ،
خدوا من الحد الأقصى وسقطوه على الحد الأدنى وخلوا الكل يعيش بكرامة
فى الأزمات وحالات الحرج والنكبات،، الكل لازم يتحمل ويشيل،، ولا ينفع أبدا البسيط والفقير يتحمل كل الضغط لوحده!! ودى حتى مش محتاجة كلام ولا تفكير ولا بحث وفحص!
خدوا من رجال الأعمال وأصحاب الشركات أضعاف ما يدفعوه واعطوا الغلابة والمنكوبين ودعموا السلع الأساسية وحتى قدموها لهم ببلاش على طريقة كراتين رمضان !
لاننا كلنا بقينا عايشين العوز وتجوز علينا الصدقة والإحسان !
ليه محافظ ولا رئيس جامعة ووزير ورئيس بنك وهيئة! يقبض الحد الأقصى وليه يركبوا أعلى وأغلى السيارات وليه الناس دى عايشة كده وإحنا نعيش كده؟
فى الأزمات لابد أن يأكل الجميع من ذات الطبق ومحدش يأكل اللحم والباقى يأكل الملح !
نعم نتحمل كل شئ من أجل الوطن، شريطة أن يتحمل الجميع وليس قلة تعيش الرغد، والغالبية تعيش العوز
وهذا ليس كلام وخلاص وتنفيس والسلام،، نحن من حقنا الكلام ومن حقنا أن نقول ما نريد أن نقوله وعليكم أن تسمعونا ولا تتهمونا بالغباء وعدم الفهم
نحن الذى لا نجد أقل إحتياجاتنا ونحن الذى نكح تراب وليس المليونيرات ورجال الأعمال من تجار الدولار ومافيا الإستيراد
! نعم نحن تحملنا وما زلنا نتحمل ولا يوجد شعب فى العالم تحمل ما يتحمله المصرى فى كل زمان ونحن بتوع شد الحزام والتقشف على مر العصور والأزمان وحتى الأن !
والأن حتى حقنا فى الكلام تسحبون منا، وكأنه من المحرمات ودليل على عدم الفهم والوطنية!
اسمعونا وفكروا فى كلامنا ولا تسخروا منه ولا تتعالوا علينا
فنحن أصحاب الحق ودود الأرض، ومن حقنا أن نطلب أبسط حقوقنا وعليكم أن تحققوا لنا ما نطلبه فنحن قدمنا كل ما نستطيعة وتحملنا فوق طاقتنا ولم يعد فى وسعنا إلا الستر وحتى الستر يريد أن يتخلى عنا بسبب الجشع والإحتكار والتعالى والإنكار
ويا مسهل
