إبراهيم مجدي 
مش كل إنسحاب بنقدمة دليل على ضعف الشخصية .
أو إنك شخصية إنهزامية . بالعكس
فى إنسحابات بتتكلم عن قوتك و يشيد بيها كل اللى بيتعامل معاك …
إنسحابك من النقاش الحاد علشان تحافظ على المحبة اللى بينك و بين شخص بتحبة دة قوة .
إنسحابك من العِشرة البطاله و أصدقاء السوء دة جدعنة مش ضعف ، علشان تحافظ على نفسك ” لأن لنفسك عليك حق ”
إنسحابك من قدام شخص مصمم يستفزك ليُخرج أسوء ما فيك دة قوة منك ، لأن الصمود قدام جرح الكلمات يسبب ندبات ف القلب عمرها ما هتشفى ولا مع مرور السنين .
إنسحابك من وجودك مع ناس مش مقدراك ، مش ضعف لكنه إحترام للذات .
إنسحابك من مغريات كبيرة قدام عيونك ، ف حد ذاته قمة القوة لإنك بتصون نفسك .
إنسحابك من طريق أنت عارف أن آخرة هلاك ليك حتى لو مشيت فية أميال ، دة قمة الذكاء .
إنسحابك من مهاترات مش هتجبلك غير وجع القلب و الدماغ دة كمان قوة . مش لأنك ضعيف و مش عارف ترد . لأن فى حكمه حقيقة بتقول ” الرد على السفهاء السكووووت ”
مش شطارة منك إنك تدخل فى جدال مع صغار النفوس ، ولا العقليات المحدودة .
لكن الشطارة و العقل اللى بجد ، هو إنك تكون شخص يهابة الآخرين ف صمته قبل كلماته .
يهابة المجتمع ف أفكاره الراجحة ، و الناجحة .
يوسف الصديق لما هرب ماكنش ضعف منه … لكنه علمنا درس ف قوة الهروب قدام أى ضغوط نتعرض ليها بقوة و حكمة يحاكى بيه الزمن و هيفضل يتحاكى بيها على مر الأزمان .
أتعلم تسحب قلبك و نفسك من اى تعب علشان تعيش مرتاح .
لأن من حقك على نفسك تعيش هادى و مرتاح البال و الروح .
و ياريت لما تتعلم تنسحب ” إهرب لحياتك ”
مش ” من حياتك “
