إبراهيم مجدي 
هناك العديد من الخيارات لأماكن خروج عائلية في مدينة بنها عاصمة محافظة القليوبية او كما يطلقون عليها بنها العسل، فأيًا كان محل إقامتك تستطيع اصطحاب أطفالك وعائلتك لقضاء وقتٍ مميز والاستمتاع بالعطلة في اماكن خروج عائلية في تلك المدينة الساحرة.
مدينة بنها العسل يعنى تفطر على عربية فول عم رجب او سندوتشين من نعنوشه ولو عاوز تضرب طبق كشرى انصحك بالزعيم او عجيبه. وانت بتشترى جريدة الجمهورية من مكتبه ابو شنب ادخل على شارع كلية الحقوق هتشوف بنات الجامعة المحترمين والشباب اللى زى الورد ولو عاوز مكان انت واسرتك وحبايبك تستريح فيه روح حديقة الطفل نهاية منطقة الفلل، أو ادخل نادى بنها الرياضى أو المعلمين ولو مشعجبك عليك بنادى الزراعيين او التطبيقيين او نادى الشرطة، وممكن تتمشى على الكورنيش وتتسلى بلب وسودانى من مقلة الهيثم واهم حاجه تحافظ على نظافة المدينة، ولو دخل عليك صلاة الظهر صلى فى مسجد ناصر اكبر واعرق مساجد بنها، الموجود بمنطقة الفلل بجوار مكتبة منار القليوبية واستراحة المحافظ، وانت هناك متنساش تاخد شوية صور بموبايلك على كورنيش النيل حيث الروعة والسحر والجمال واستمتع بمنظر النيل وانت قاعد فى احضان أشجار البومباكس واشجار الزينة واشرب حمص الشام من عربية حوده ولو مش معاك فلوس قوله عالنوته مش هيقول حاجه.
مدينة بنها العسل جميلة وتزداد جمالا بوجود حضرتك، حيث تضم عاصمة القليوبية موقع أثرى مهم وهو تل أتريب، الذى تشير النصوص إلى أنه أقدم بقايا أثرية بهذا التل تعود لعصر الملك أحمس أول ملوك الأسرة 18،وهو يقع بمنطقة الاثار بجوار السجل المدنى.
علشان تتسوق وتشترى هدايا للاهل والاصدقاء انصحك تروح فورا على شارع فريد ندا، اكبر شوارع بنها العسل، أو تروح شارع عطا هتلاقى كل حاجه محتاجها من الابره للصاروخ وباسعار معقوله جدا لان معظم التجار هناك معروفين ولهم سمعة طيبة بس اوعى تدخل بالعربية، لان الازدحام شديد فى هذه المنطقة الاشهر تجاريا منذ نشأة المدينة، ولو عاوز تركن عربيتك، ممكن تركنها بجوار سور السكة الحديد، بداية من تمثال سعد زغلول ومرورا بكنيسة السيده العزراء مريم ومدرسة السلام ( سنودس النيل الانجيلى) وحتى سنترال بنها الجديد.
ومتنساش قبل ختام فسحتك ورجوعك الى بيتك، تزور اضرحة اولياء الله الصالحين التى يتبارك بها اهل بنها، ففى اول شارع كلية التجارة ضريح العارف بالله سيدى نصر الدين وفى منطقة الشدية ضريح سيدى العاصمى، واما ضريح سيدى ابو نوار فيوجد فى المنشيه لان من زار الاعتاب ماخاب.
قال تعالى: ألا إن أولياء الله لا خوف عليهم ولا هم يحزنون * الذين آمنوا وكانوا يتقون * لهم البشرى في الحياة الدنيا وفي الآخرة لا تبديل لكلمات الله ذلك هو الفوز العظيم * ولا يحزنك قولهم إن العزة لله جميعا هو السميع العليم.. صدق الله العظيم
