إبراهيم مجدي 
في زمن بقى فيه “مين قال إيه على لايف مين” أهم من خبر اكتشاف علمي، وفي وقت بقى فيه لقب “ترنداوي” أهم من شهادة جامعية… إحنا بنضيع، وبنضحك واحنا بنضيع .
جيل حافظ آخر تريند رقص، بس مش حافظ الرقم القومي بتاعه .
جيل بيصحى يفتح التيك توك قبل ما يفتح عنيه ويبدأ يومة بصلاة ويدعي ربنا دعوة لا دا بيبدأ بترند جديد ويقلد شوية تافهين في مهرجان من المهرجانات التافهة، وبيقفل اليوم وهو بيبعت ميم مكتوب عليه “الزهايمر بدأ وأنا لسه ٢١ سنة” آه والله، الزهايمر الحقيقي إنك تكون عايش في عصر الذكاء الاصطناعي… ولسه بتتعامل مع التكنولوجيا على إنها وسيلة تحط وشك في فلتر كلب !!!
الروبوتات دلوقتي مش بس بتشتغل، دي بترقّي نفسها، وانت لسه مستني البوست بتاعك يجيب ١٠٠ لايك عشان تحس بقيمتك في الحياة وكل ما زادت لايكاتك بتزداد قيمة ودا من وجهة نظر الجهلاء .
دالوقتي فيه شركات عالمية بدأت تتخلى عن وظائف كثير يقوم بيها البشر واستبدلتهم بروبوت ياريت تلحق قبل ما مديرك يبقا روبوت وانت مش عارف تتعامل معاه .
يا نجم الترند، أنت محتاج تفهم إن الحياة مش دايمًا رقص على أنغام أغنية نازلة من يومين وصدقني زيكو النخلاوي او الدخلاوي وغيره من مروجي المهرجانات الي خربت الذوق العام مش هاينفعوك هما جمعو لهم قرشين وانت ما فيش في جيبك الا اثنين جنيه الا ربع ولسه مغيب عن الواقع وبتقول انا مش لاقي شغل يا ريت تفوق من الغيبوبة يا شبح على السكة وعالدوغري بحاول اتكلم معكم بلغتكم التي جعلت المجتمع في الدرك الاسفل وكأننا لا ننطق العربية !!!
والله ما حد ضد الضحك، بس لو قضيت كل وقتك بتضحك… هييجي اليوم اللي تبكي فيه وانت بتتسحب برّه سوق الشغل لأن الروبوت خد مكانك، ومش بس كده… خد ترندك كمان !
بس لحظة… البلد واخدة بالها وسبقاك بخطوتين !!
اللي مش واخد باله إن الدولة بقالها سنين ماشية في السكة دي وبتقولك
“قوم اتعلم… إحنا بنجهزلك الطريق”
الرئيس عبد الفتاح السيسي بنفسه وجّه بدعم مجالات البرمجة والذكاء الاصطناعي، وأن الجيل الجديد لازم يكون مُجهز لمستقبل رقمي .
اتعملت مبادرات، وانطلقت منصات، وتأسست مراكز تدريب في الجامعات والمدارس، وكل ده عشان لما المستقبل ييجي يقول: “مين جاهز؟”، نرفع إيدينا بدل ما نعمل دويت باكستاني على إنستغرام !!
فلو الدولة بتقولك “قوم اتعلم”، والرئيس بيقول “جهزوا شبابنا لعصر الذكاء الاصطناعي
يبقى إنت هتفضل لسه بتجري ورا الفلتر اللي بيكبر شفايفك ويصغّر مخّك؟
الختام؟
اتعلم برمجة وذكاء اصطناعي ، مش عشان تبقى أينشتاين،
بس عشان تبقى في الصورة
قبل ما الصورة تتعدل من غيرك .
