سيد الدكروري 
الكاتبة والشاعرة : امال محمود
من ديوان شيء وضده
( مش غبية! )
لما ضاعت مني فرصة
أنت لسه فرصتي
قلت: جايز بُكره يحلى
وتتفتحلي سكتي
سكتي دي سهلة خالص
عُمْر ما يسوقها مصالح
دنيتي دي بكلمة واحدة
راح تفوز بمحبتي
عُمْر ما يفرق معايا
كنت إيه أو صِرت إيه؟!
أو يكون الفقر بيتك
أو رجل أعمال وبيه
إللي يفرق عندي كلمة
بيها تاخد نور عنيّا
مهما زاد الليل بعتمة
كلمة تِطرح فجر ليا
(ياحبيبتي) .. لو تقولها
عندي دي أغلى هدية
بالفلوس إنسى تنولها
دي مشاعر .. مش تكيّة
دي حياتي ودي أصولها
عاشقة لكن .. مش غبيّة
_______
