ثلاثة ولاد و شايب

تأليف/أمجد السيد العربى موسى

الأبطال

١_الحج عوض أبو المكارم: يملك شركة زات سمعة طيبة فى مجال التسويق و مصدر ثقة أى شركة تريد أن تسوق منتجاتها
٢_الحج محمد الطيب: رئيس حسابات الشركة و الصديق المقرب للحج أبو المكارم
٣_منير: الإبن الأكبر للحج عوض
٤_منذر: الإبن الأوسط للحج عوض
٥_مكرم: الإبن الأصغر

أبطال ثانويه

١_شلة منير مكونين من صديقين
٢_المعلم عتمان: جزار
٣_الدكتور

الأحداث
تحضر عربة إسعاف مسرعة لمقر شركة أبو المكارم للتسويق ينزل المسعفين منها متوجهين لمدخل الشركة
(الحج محمد) : من هنا يا جماعه المكتب من هنا
يدخل الحج محمد مكتب الحج عوض حيث كان الموظفين و أبنائه الثلاثة ملتفين حول الحج عوض
(منير) : بعد إذنكم يا جماعه وسعوا شوية
يحمل المسعفين الحج عوض لعربة الإسعاف
(منير) : أنا هركب الإسعاف و إنت يا منذر و أخوك حصلونى بالعربية
(الحج محمد) : إستنانى يا مكرم جاى معاكم
يتوجه الجميع للمستشفى و يستقبل الدكتور الحج عوض مدخله لحجرت الإسعافات ليقوم بإسعافه
(الدكتور) : لو سمحتم يا جماعه بهدوء إستنوا بره هنقوم باللازم
يقف الأبناء الثلاثة خارج الحجره منصاعين لأوامر الطبيب و القلق يغمرهم
(الحج محمد) : إن شاء الله ربنا هيقوموا بسلامة
(مكرم) : هو إيه إللى تعبوا حاجة دايقتوا
(الحج محمد) : أنا دخلت عليه المكتب لاحظت إنوا تعبان قولتلوا يروح رفض و طلب منى أجيبلوا كشف حسابات أخر شهر طلعت من مكتبوا عشان أجيب الكشف بعد دقائق رجعت لقيتوا حاطط إيدوا على قلبوا و مش قادر يتنفس إتصلت بسرعة بالإسعاف ده إللى حصل
(منذر) : ياما قولتلوا يا حج لازم ترتاح من الشغل و إحنا موجودين كان بيرفض
(مكرم) : إنتى يعنى مش عارف أبوك الشغل حياتوا لو ريح يوم بيتعب أبوك إتعود على الشقا
يخرج الدكتور و يلتف حوله الحج محمد و الأبناء الثلاثة
(منذر) : طمنا يا دكتور
(الدكتور) : للأسف لازم يعمل عملية حالا عملية دعامة فى القلب متقلقوش العملية بسيطه بإذن الله
(مكرم) : يعنى مفيهاش خطورة يا دكتور
(الدكتور) : بإذن الله لأ هروح أشرف على تحضير قوضة العمليات
(الحج محمد) : ربنا إن شاء الله هيقوموا بسلامة

يتم إدخال الحج عوض حجرة العمليات و تتم إجراء العملية و بعد عدة ساعات يخرج الدكتور من حجرة العمليات فيذهب الجميع متلهف للإطمئنان على حالة الحج عوض

(الأبناء الثلاثة) : طمنا يا دكتور
(الدكتور) : الحمد لله العملية نجحت بس هيقعد يومين فى العناية المركزة و بعد يطلع على قوضه لوحدو
(الحج محمد) : طيب مينفعش نشوفه
(الدكتور) : لا طبعا بإذن الله بعد يومين
(منذر) :شكرا يا دكتور
يمشى الدكتور و يذهب منير لدفع حساب المستشفى فى الحسابات و بعد يومين يأتى الأبناء و الحج محمد للإطمئنان على الحج عوض
(الحج محمد) : حمد لله على السلامة يا عشرت العمر
(الحج عوض) : الله يسلمك يا محمد
(الأبناء الثلاثة) : حمد لله على السلامة يا بابا… و يقبل كل إبن يد والده
(الحج عوض) : الله يسلمكم يا ولاد طمنونى أخبار الشغل إيه
(منير) : شغل إيه بس يا بابا إحنا فى إيه ولا فى إيه
(الحج محمد) : كل حاجه ماشيه تمام يا حج عوض مش ناقص غير إنك تقوملنا بسلامة و تنور شركتك
يوجه الحج عوض كلامه لأبنائه
(الحج عوض) : أنا قررت إن عمكم محمد هيبقى المسؤول المؤقت عن إدارة الشركة و طالب من كل واحد فيكم يجيبلى أحسن حاجه فى الدنيا من وجهة نظروا بمعنى إيه هى أحسن حاجه فى الحياة و بناء على إختيار كل واحد فيكم هختار المسؤول عن إدارة الشركة بشكل نهائى
ينظر الأبناء إلى بعضهم شاعرين بالتعجب من طلب والدهم
(الحج محمد) : ربنا يديك الصحة و طولت العمر يا حج عوض
(الحج عوض) : خلاص يا محمد معتش فاضل كتير و إللى جاى مش أد إللى راح و أنا نفسى قبل ما قابل رب كريم أتطمن على الولاد و على كفاءة إللى هيدير الشركة من بعدى قدامكم أسبوع من دلوقت و كل واحد فيكم إنتم التلاته يجيلى بإختياره و يفسرلى سبب إختياره
(منذر) : ربنا يديك طولت العمر يا بابا
و يكررها منير و مكرم و الحج محمد الطيب
(الحج عوض) : قدامكم أسبوع من دلوقت و إللى إختياره هيقنعنى هو إللى هيبقى رئيس مجلس إدارة الشركة و ده مش معناه تفضيل حد على حد كلكم بتكملوا بعض الحج محمد هيبقى القائم بأعمال رئيس مجلس إدارة الشركة خلال الأسبوع ده
يمشى الجميع و يمشى الثلاثة شباب كل منهم فى طريق و كل واحد منهم يفكر فى طلب والده
يذهب منير لأصدقائه كانوا معتادين التجمع فى أحد الكافيهات
(الصديق الأول) : أهلاااً منير عاش من شافك يا راجل
(الصديق الثانى) : منير وحشنى والله
(منير) : الله يخليكم و إنتم وحشينى أنا واقع فى مشكله و جايلكم تساعدونى
(الصديق الثانى) : خير يارب
(الصديق الأول) : قلقنا
يحكى منير لأصدقائه عن طلب أبوه منه
(منير) : عقلى واقف مش عارف أفكر
(الصديق الأول) : ههههههههههه يا عم خضيتنا هى دى المشكلة
(الصديق الثانى) : يا عم سهله و معروفه
(منير) : يعنى إنتم شايفين إيه هى أهم حاجة فى الدنيا فى حاجات كتير فى دماغى بس مش عارف أستقر على إختيار
(الصديق الأول) : بص يا صاحبى أهم حاجه فى الدنيا و إللى الدنيا متمشيش من غيرها الفلوس الفلوس كل حاجه فى أى حاجه الفلوس العيشا العالية هى الأمان هى إللى بتجيب أى حاجه فى أى وقت
(الصديق الثانى) : و الله عندك حق كلامك صح
يفكر منير ثم يرد
(منير) : و الله صح عندكم حق الفلوس كل حاجه و أهم حاجه شكرا يا رجالة والله مكنتش عارف أعمل إيه من غيركم

يمشى منذر فى طريقاً وحيداً يفكر ثم بدأ فى التفكير بصوت مسموع
(منذر) : أحلى حاجة فى الدنيا الست .. الست هى الأم هى الووجه الصالحه إللى بتقف جنب جوزها فى أى ظروف و فى أصعب الظروف هى إللى بتشجع جوزها على النجاح و الدليل أمى الله يرحمها وقفت جنب أبويا لحد ما بقى راجل ناجح تبقى الست أهم حاجه فى الدنيا

لم يستغرق مكرم وقت كإخوته توجه لمحل جزارة
(مكرم) : سلام عليكم يا معلم
(المعلم عتمان) : و عليكم السلام يا باشا أأمر
(مكرم) : عايز لسان
(المعلم عتمان) : أحلى لسان يا بيه
يقوم المعلم عتمان بتحضير اللسان لمكرم و إعطائه له
(مكرم) : ألف شكر يا معلم
و يدفع مكرم حساب اللسان للمعلم عتمان
بعد يومين يذهب الثلاثة شباب لوالدهم فى حضور الحج محمد الطيب
(الحج عوض) : معقوله لحقتم ده لسه الأسبوع مخلص طيب كل واحد إتأكد من إختياره قبل ما يجى
(منير) : أنا عن نفسى متأكد من إختيارى
(منذر) : و أنا كمان
(مكرم) : و أنا كمان جاهز و متأكد من إختيارى
(الحج عوض) : ماشى هبتدى بالكبير منير إيه إختيارك و سببوا
(منير): أنا إخترت الفلوس أهم حاجه فى الدنيا ببساطه لولاها مكنتش شركتنا و بنشتغل عشان نكسبها
(الحج عوض) : و إنت يا منذر إخترت إيه
(منذر) : الستات الست هى الأم هى الزوجه الصالحه إللى بتوقف جنب جوزها و بتشجعوا على النجاح و الدليل أمى
(الحج عوض) : الله يرحمها و يحسن إليها أمك وقفت جنبى كتير و إنت يا مكرم
(مكرم) : اللسان
(الحج عوض) : إشمعنى
(مكرم) : اللسان بيعرفنا مين هو الإنسان إلى قدامك هو مصدر الكلمه بكلمة ممكن الناس تحبك أو تكرهك الكلمه الطيبه صدقه اللسان أساس شغلنا يعنى لسانا وحش مع العملاء حتى لو بنقدم أفضل طرق فى التسويق العملاء مش هيتعاملوا معانا
(الحج محمد) : الله يفتح عليك يا مكرم
(الحج عوض) : إختيارك أكتر إختيار أقنعنى عشان كده إنت يا مكرم إللى هتبقى رئيس مجلس إدارة الشركة و عايزكم تساعدوا أخوكم فى الأخر دى شركتكم كلكم و إنت يا مكرم تخلى إخواتك مشوره ليك
(مكرم): يارب أكون عند حسن ظنك
(منير) :مبروك يا مكرم
(منذر) : مبروك يا مكرم

تمت بحمد الله